In memoriam
Severino Zapico
David Fernández
Oscar Álvarez
En setiembre del añu 2013 la Banda de Gaites de Corvera d’Asturies ® (BGCA) fixo una xira per China que la llevó a actuar en ciudades como Shanghay, Luoyang y Pekín pero, sobre manera, lo que llamó l’atención de tolos medios de comunicación foi’l conciertu que dio na Gran Muralla China, una de les siete maraviyes del mundu.
Pa sorpresa de les decenes de miles de persones qu’asistieron a los festivales y conciertos que fixo la banda na so xira asiática, l’agrupación asturiana más internacional interpretó una versión de la canción tradicional china «Mólíhuā», perpopular en tol país, con un significáu asemeyáu al del nuestru «Asturies patria querida», que causó, perdayures, la empatía del públicu que nun duldó nin un momentu n’arrancase a cantala al son de les gaites asturianes.
Dende estes llinies quiero convidar a tola xente que tenga nes sos manes esti discu, a que lu disfrute tastiándolu selemente como’l que saborguia un carambelu que quier que nun se-y acabe, porque’l soníu de la gaita ye quien a facete viaxar a sitios nunca visitaos, a mundos imaxinarios, a llugares máxicos.
Bras Rodrigo
Mólíhuá
Belenia (Bras Rodrigo)
Igües percusión: José Miguel Gómez.
Dende cuantayá, nes milenaries viesques d\’Asturies, l\’adoración a les dioses celtes de la natura foi un vezu habitual y abondo espardíu. Una soleyera y fría mañana, una d\’eses divinidades quixo esfrutar de la máxica música de los astures pero foi descubierta…
Marcha Celta (Tradicional)
Igües gaites: Bras Rodrigo. Igües percusión: Lorena G. Prieto y Manuel Durán.
Antiguu entemediu de misa recoyíu en Teberga y conocíu popularmente en toa Asturies como la Marcha Celta.
Mólíhuá (Flor de xazmín) – (Tradicional china)
Igües gaites: Bras Rodrigo. Igües percusión: José Miguel Gómez.
El día 22 de setiembre del 2013 la Banda de Gaites de Corvera d’Asturies facía historia na Gran Muralla China, con un conciertu onde interpretó la pieza más popular d’aquel país: «Mólíhuā»; esti tema fíxose famosu n’Occidente cuando Giacomo Puccini la incluyó na so ópera Turandot.
Muñeira de Bernardo (Bras Rodrigo)
Igües percusión: José Miguel Gómez y Lorena G. Prieto.
Muñeira compuesta pol nuestru director y dedicada a Bernardo Ribeiro, un paisanu, un collaciu, un celta.
Fui al Cristu [Fui al Cristu(tradicional)/Que lleves nesa saya (tradicional)/Muñeira d’Antroxu (Bras Rodrigo)]
Igües gaites: Bras Rodrigo. Igües percusión: José Miguel Gómez y Lorena G. Prieto.
Set compuestu de tres temes. Los dos primeros son cantares perconocíos en tol País Astur y nacíos en Candás. El terceru ye una muñeira compuesta pel tiempu l’Antroxu.
Baxaron Cuatro Ayeranos [Baxaron cuatro ayeranos (tradicional)/ Añada (Bras Rodrigo)/Naquél malecón (Bras Rodrigo)]
Igües gaites: Bras Rodrigo. Igües percusión: José Miguel Gómez y Lorena G. Prieto.
Esti tema ye un amiestu de tres pieces. La primera d’elles ye una tonada mui guapa y perbién conocida n’Asturies. La segunda tien por nome completu «Añada pa les neñes que nun pueden durmir»; les añaes son canciones que se canten a los neños pa dormilos mientres se tienen en cuellu o se ximielga’l bierzu. Ésta ta dedicada pa los neños y neñes que nun pueden dormir. La pieza que pieslla ye una habanera que fala d’un home qu’emigra a «facer les amériques» porque en casa namás que-y queda’l dolor pola muerte d’una madre.
Saint Patrick´s [Pasucáis del Dos de Mayu (tradicional)/ Saint Patrick’s Andro (tradicional bretona)]
Igües gaites: Bras Rodrigo. Igües percusión: José Miguel Gómez,Manuel Durán y Lorena G. Prieto.
El «Pasucáis del Dos de Mayu» cuenta la lleenda que lu tocaron los exércitos asturianos escorriendo a los invasores cuando la Francesada hasta les mesmes puertes de Burdeos. Esta versión que tocamos sentímosla al grupu Llan de Cubel. Los andrós son dances tradicionales de Bretaña hermanes de les nuestres xirandiyes. El «Saint Patrick’s Andro» volvióse mui popular sobre manera pola versión que fixo d’él el gaiteru Carlos Núñez.
Baile para una Princesa (Bras Rodrigo)
Igües percusión: José Miguel Gómez.
Esti amiestu ente valsiáu y xota ye pa la princesa Nadaya y pa toles princeses que dellos tenemos en casa.
Atlantic Lane [Red River Valley (tradicional norteamericana)/ Te Deum (Marc- Antoine Charpentier)/ Aires de Pontevedra (tradicional gallega)/Xiringüelu de Remis (tradicional)/ Atlantic Lane (Bras Rodrigo)]
Igües gaites: Bras Rodrigo. Igües percusión: José Miguel Gómez y Lorena G. Prieto.
L’Arcu Atlánticu o Atlantic Lane ye una rexón xeográfica europea perbién afitada con xeitos culturales y antropolóxicos comunes en tolos pueblos célticos que viven nella dende los tiempos neolíticos y de la que, dende la emigración céltica (irlandeses, escoceses, asturianos, bretones y gallegos) a los Estaos Uníos y Canadá, tamién forma parte la costa este de los mesmos. Por eso esti tema ye un amiestu d’una canción tradicional norteamericana (Estaos Uníos y Canadá) como ye «Red River Valley», conocida como la canción del cowboy, col «Te Deum» de Charpentier, que ye la sintonía de les esencies paneuropees, llegando tamién a los aires atlánticos gallegos con «Aires de Pontevedra» y acaba con un xiringüelu del afamáu gaiteru Remis Ovalle y una pieza de nueva composición que ye la que da’l nome al set.
Aires Mariñanes [Al amanecer (popular)/ Nun hai quien pueda (Popular)/ La Fonte del Cañu (Popular)/ Na beira do mar (popular)/ A rianxeira (popular)]
Igües gaites: Bras Rodrigo. Igües percusión: José Miguel Gómez y Lorena G. Prieto.
Pupurri de temes populares con tastu a salitre que se canten en tola Cornisa Cantábrica.
Mólíhuá (Flor de xazmín)
Bonus Track
Collaboraciones
Guitarra y buzuqui nos temes 7 y 9: Rubén Bada
Hulusi en tema 2: Bras Rodrigo
Erhu nos temes 2 y 11: Lin Gao
Voz en tema 11: Ziwen Chen
Lin Gao (Erhu):
Nacida en Shanghai en 1988, Lin Gao principió los sos estudios d’erhu con namás tres años; dende 2007 estudió con Yonggang Huo nel Conservatoriu de Música de Shanghai. Tien ganao bien de primeros premios como miembru de dellos conxuntos y tamién como solista. Nel 2009 foi concertinu na Xoven Orquesta China del Conservatoriu de Música de Shanghai, anguaño ye componente de la Orquesta China de Singapur.
Ziwen Chen (Voz):
Nacíu en 1997, Ziwen Chen estudió l’erhu con so padre. Nel 2010 foi almitíu nel Conservatoriu de Música de Shanghai, onde cursó estudios de banhu y erhu con Yonggang Huo. Ganó dellos primeros premios nes competiciones nacionales pa estos instrumentos y angüaño ye l’únicu intéprete del país que foi premiáu en dambos.
Gracies fonderes a:
Xune Elipe y L’Aguañaz/Goxe Producciones por enfotase na banda pa que salga a la lluz esti discu, a Sergio Rodríguez y tola xente de Tutu Estudios, al Conceyu de Corvera por sofitanos, a Luis y los collacios d’Enfoque Visual, a Chema Vega y Berto García pola revisión de los testos, a Luis Miguel Suárez y tola xente de Ca Otura por ayudanos en too pa la grabación del videoclip, a Carlos y José Manuel González Posada de Ca’l Mayorazu por dexanos grabar na Carbayera de Solís, a Rubén Bada por eses cuerdes, a Lin Gao, de la Orquesta Sinfónica de Singapur, pol erhu en «Mólíhuā», a Ziwen Chen pola so voz nel «Mólíhuā Mix», a Miguel Laburu poles sos xestiones, a tolos qu’andecháis y collaboráis con nós.
